தமிழ்நாடு காங்கிரஸ் கமிட்டி தலைவர் திரு. ப. மாணிக்கம் தாகூர், எம்.பி. அவர்கள் தலைமையில், சட்டமன்ற காங்கிரஸ் கட்சித் தலைவரும், தமிழக சுற்றுலாத்துறை அமைச்சருமான மாண்புமிகு செ. ராஜேஷ்குமார் அவர்கள் முன்னிலையில், மாவட்ட காங்கிரஸ் கமிட்டி தலைவர்கள் கூட்டம், இன்று சென்னை சத்தியமூர்த்தி பவன் நடைபெற்றது.

இக்கூட்டத்தில் கீழ்க்கண்ட தீர்மானங்கள் நிறைவேற்றப்பட்டன.
தமிழ்நாடு காங்கிரஸ் கமிட்டி தலைவராக நியமிக்கப்பட்டுள்ள திரு. ப. மாணிக்கம் தாகூர், எம்.பி. அவர்களுக்கு இக்கூட்டம் மனப்பூர்வமான வாழ்த்துக்களை தெரிவித்துக் கொள்கிறது.
தமிழகத்தில் 1967 இல் காங்கிரஸ் ஆட்சியை இழந்த பிறகு திராவிட இயக்கங்களோடு கூட்டணி அமைத்து ஆட்சி அமைக்கப்பட்டாலும் ஆட்சியில் பங்கு பெற முடியாத நிலை இருந்தபோதும் இன்றைக்கு த.வெ.க. ஆட்சியில் பங்கு வகித்து இரண்டு அமைச்சர்கள் பொறுப்பேற்றுள்ள சூழ்நிலையில் தாங்கள் தலைவராக பொறுப்பேற்றிருக்கிறீர்கள். தமிழக வரலாற்றில் 60 ஆண்டுகளில் இல்லாத புதிய சகாப்தத்தை தொடங்கி வைக்கிற அற்புதமான வாய்ப்பு காங்கிரஸ் தலைமை உங்களுக்கு வழங்கியிருக்கிறது. இதுவரை எந்த தலைவருக்கும் கிடைக்காத வாய்ப்பு தங்களுக்கு கிடைத்திருக்கிறது. இந்த அரிய வாய்ப்பை பயன்படுத்தி காங்கிரஸ் கட்சியின் அடிப்படை கட்டமைப்புகளை வலிமைப்படுத்துகிற மகத்தான பணி உங்களை எதிர்நோக்குகிறது.
தலைவர் ராகுல்காந்தி அவர்களுக்கு தமிழ்நாடு பேராதரவு வழங்க தயாராக இருக்கிறது. அவருக்கு வழங்கப்படுகிற ஆதரவை வாக்குகளாக மாற்றி 2029 தேர்தலில் நாற்பதும் நமதே என்கிற இலக்கோடு தங்கள் தலைமையில் வெற்றிகாண இக்கூட்டம் தங்களை மீண்டும் வாழ்த்தி உங்களது நியமனத்தை வரவேற்கிறது.